Da Früahling is iatz erwacht,

de Sunn scho warm vom Himmi lacht.

De Vogei singan in da Früah,

und ois treibt aus, steht boid in Blüah.

Und uns treibt´s aussi, aba ned z´weit,

ganz in da Näh bleibm, in dera schwierign Zeit.

Doch an Vorteil ham ma, bei uns is´s so schö´,

ma braucht ja gar ned wo andas higeh´.

Lass ma uns de Frühalingszeit ned vadriaßn,

wenn ma a dahoam bleibm müassn.

Mia derfan hoit iatz ned ois doa,

und manch oana is oft ganz alloa.

Doch oans do draus ma lerna kannt,

war wieda a bessas mitanand.

Schaun auf de Andan und auf unsan Herrn,

de Zeitn werdn scho wieda bessa werdn.

Is a verändert unsa Doa und de Zeit,

lass ma ins Herz nei de Ostafreid.

Christ ist erstandn, so soi´s klinga,

mia derfan wieda Halleluja singa.

Aus ganzm Herzn und volla Freid,

a bissei Hoffnung für alle Leit.

                                              

Anni Utz Ostern 2020